حكيم بن حزام "بن اخو السيده خديجه " و هوه فى السوق لاقى ولد صغير شكله جميل بيتباع في سوق الرقيق فأختاره عشان يخدمه في بيته..الولد ده اسمه زيد بن حارثة.. الولد ده ابن اسرة كبيره من أسر العرب ،و اتخطف من أهله وهو صغير وأخدوه وباعوه في سوق الرقيق ، فحكيم اشتراه ولقاه جميل ومؤدب ، و لأنه كان بيحب عمته خديجه جدا ،قرر يديلها زيد هديه ♡
والسيده خديجة كمان حبته واديته هديه لمحمد صلى الله عليه وسلم عشان يساعده ، وزيد حب محمد ﷺ جدا جدا وبقى بينه وبين محمد عليه الصلاه والسلام علاقة أُبوة و صحبه ،
عاش مع النبي ﷺ كتير..لكن أهل زيد كانوا بيدوروا عليه واعلنوا عن مكافأت ماليه للي يلاقي ابنهم زيد لغايه ما جاتلهم أخبار إن زيد في مكة في بيت واحد اسمه محمد بن عبد الله و لقبه بين قومه الصادق الأمين ♡ ..
فيستبشر حارثة "ابو زيد" وبسرعه راح مع اخوه لمكة عشان يحاولوا يخدو زيد و اخدو فلوس كتير معاهم عشان يدفعوها لمحمد صلى الله عليه وسلم.. المهم وصلوا وخبطوا على الباب وفتح محمد ﷺ وقال : ماذا تريد يا أخي ؟ قال حارثة : يا محمد أنا أبو زيد ، يا محمد جئتك من بلادي وجمعت لك كل هذا المال لأفتدي ابنى..
ووالله ما سمعت عنك إلا كل خير وانك أنت الصادق الأمين.. وأنك لن ترُدنا .فما عهدنا عليك إلا كل الخير (يعنى عمرنا ماشفنا منك يا محمد غير الخير
<3 )فقال النبي ﷺ : يا حارثة ألا أُخبرك بخير من هذا ؟ قال : ماذا يا محمد ؟ فقال ﷺ : نأتي بزيد نُخيره (عشان زيد يحس ان محمد ﷺ باقى على العشره ومش هيفرط فيه بسهوله).. وكمان قال ﷺ:فإن إختارك .. فهو لك بغير مال ، وإن اختارني فما كنت بالذي يترك من اختارني. فيوافق حارثه
فينادي النبي ﷺ على زيد ويقول له : تعرف مين الناس دى؟ فقال زيد : ايوه ده ابويا و ده عمى.. فحضنهم وحضنوه وعيطوا جامد اوى..فالنبي ﷺ يقوله : يا زيد انا هخيرك.. ابوك جه وعايز يخدك ويدفع فلوس ، لو انت عايز ترجع مع أبوك فارجع من غير ما يدفعلى اى فلوس و لو عايز تفضل معايا فأنا مش هسيبك أبدآ .. وسكت النبى ﷺ
وزيد مخدش وقت حتى عشان يفكر ، وقال : طول منا عايش عمرى ما هسيبك أبدا ..
حارثه "ابو زيد" اتخض و قاله: أفقدت عقلك يا زيد !! أتختار العبوديه على الحرية ، أتختار الرق على أبيك وعمك !!!
فقال زيد : والله يا أبي إنك لا تدري ما رأيت مع هذا الرجل ولا تدري ما هذا الرجل ..فما في البشر أحسن منه وما كنت لأتركه أبدا ما حييت (يا جماعه انتو متخيلين كل ده وكان لسه محمد ﷺ مبقاش نبى ) فبكي محمد صلى الله عليه وسلم و حضن زيد و خده من إيده وطلع بيه عند الكعبه و بصوت عالى قال : يا معشر قريش ، يا معشر قريش ،أشهدكم من اليوم ان زيد هذا هو ابني يرثني وأرثه ، هو زيد ابن محمد..
(محمد أعلن انه هيتبنى زيد ♡)..ففرح زيد و كان مفيش مخلوق على وجه الأرض أسعد منه ، وعاش كتيييييير بإسم زيد بن محمد ﷺ
وبعد كده هنعرف ان لما نزل القرآن والوحى بالنبوه على رسول الله ..نزلت أيه بتحريم التبنى :."ادْعُوهُمْ لِآبَائِهِمْ هُوَ أَقْسَطُ عِندَ اللَّهِ" فى سوره الأحزاب ..و زيد هيبقى لازم اسمه يرجع و يبقى زيد بن حارثه .. و هيحزن زيد و هيبكي و هينقطع عن الناس ..والنبي ﷺ هيبقى مش فى إيده شئ و مش عارف يعمل ايه عشان زيد ميزعلش..
لكن ربنا هو الجبار الذى يجبر قلوب عباده ..سيدنا زيد زعلان عشان اسمه مبقاش زيد بن محمد.. فكان الجبر من الله فى أن سيدنا زيد هو الصحابى الوحيد اللى هيتذكر اسمه بحروفه فى القرآن وهتنزل الأيه الكريمه فى نفس السوره كمان :" فَلَمَّا قَضَىٰ زَيْدٌ مِّنْهَا وَطَرًا زَوَّجْنَاكَهَا " و هيفضل كل مسلم يقرا اسم زيد ليوم القيامة..
^_^النبى ﷺ انهارده عنده 35 سنه ، بدأت الكعبه تنهار ، محتاجين يهدوها لحد القواعد (عواميدها) الاساسيه بس وبعدين يكملوا البناء والترميم..فقريش خافت تيجي تهدها يحصل زي ما حصل لأبرهه " حادثه الفيل المشهوره" .. لما جه ابرهه يهد الكعبه وكان فى مقدمه الجيش فيل والفيل وقف ومرداش يتحرك ..وفى نهايه القصه ربنا ارسل طيور بحجاره من جهنم ترميها عليهم..
الكعبه لازم تترمم و الكفار خايفين .. طب وإيه الحل وياترى هيهدوها وللا لأ ؟
فى وسط الحيره دى قام راجل منهم اسمه الوليد بن المغيره قال : يا قوم أتريدون أن تهدموها لخير أم لشر ؟ فقالوا : لخير والله فقال : إن كان لخير فلن ينزل عليكم غضب من السماء وقال : أنا سأبدأ بالضرب بالفأس فإن لم تنزل حجارة من السماء أكملوا الضرب..
وفعلا محصلش حاجه ..و بدأو يرمموا الكعبه من جديد ( متنسوش ان قريش كفار ..مشركين بالله ..يعنى يؤمنوا برب فى السماء لكن معاه سبع.. تمن ألهه من الاصنام فى الارض
^_^ ) و عشان كده مش غريب انكم تعرفوا ان كمان قريش ركزت ان كل اللى هيتصرف على ترميم الكعبه لازم يبقى حلال ، لا ناتج من زنا ولا من تجارة خمور ولا تجارة رقيق وده دليل على تعظيمهم للبيت الحرام(طيب بس عرفوا منين الحلال من الحرام و مكنش لسه فيه إسلام؟ ده لأن دى الفطرة اللى ربنا عز و جل خلق عليها كل إنسان قال تعالى: فَأَلْهَمَهَا فُجُورَهَا وَتَقْوَاهَا)
المهم جمعوا الفلوس الحلال لكن للأسف مكنتش كتيره فعشان كده معرفوش يكملوا بناء الكعبه..فعملوا سور كده وسموه حجر إسماعيل (اللى شبهه نص دايره .. اللى بتشفوه حوالين الكعبه . فعشان كده لما تروح الحرم وتصلى في حجر إسماعيل بيقولولك.. انت كده كأنك صليت جوه الكعبه لان ده جزء من الكعبه ولم يكتمل بناؤه )
دلوقتى فاضل الحجر الأسود عشان يتحط جوه الكعبه ، لكن فيه مشكلة .. إيه هيه؟ المشكله ان كل قبيلة من قبائل قريش عايزة السيد بتاعها ينقل الحجر بإيديه و تنول الشرف ده ، قبيله عبد مناف وبني هاشم وبنو عدي وعبد شمس ... قبائل كتيره اتخانقوا و كانت هتقوم حرب أهليه..
فيقترح الوليد بن المغيرة عليهم إقتراح و يقول : يا جماعه.. انتو هتموتوا بعض!!! ايه رأيكم نخلى اول واحد يدخل علينا من الباب هوه اللى يحكم بينا ويضع الحجر ؟!..قالوا : طيب موافقين ..ويتفتح الباب بعد دقايق ، ويدخل مين؟
يدخل محمد عليه الصلاه السلام
<3ففرحوا اوى وقالوا بصوت عالى : رضينا بالصادق الأمين.. رضينا بالصادق الأمين ..ويحكو لمحمدﷺ المشكله ويقولوله احكم بينا (متنسوش ان كل ده قبل النبوه ♡ )
فمحمد صلى الله عليه و سلم قال فكره زكيه جدا جدا قالهم يجيبوا قماشه كبيره أو عبايه و يحطوا الحجر الاسود فى نص العبايه وكل سيد لقبيلة يمسك طرف من اطراف العبايه دى (و بكده كل القبائل هتبقى اشتركت فى نقل الحجر الاسود و لما وصلوا عند الكعبه مسك
محمدﷺ الحجر بإيده وحطه
^_^اللهم صل وسلم وبارك على حبيبنا وحبييكم سيدنا محمد
تعليقات